Bloggsíða Guðmundar VE

Sæl veri þið

Löndunin á Þórhöfn gékk vel og var spottunum sleppt fljótlega eftir að síðasti löndunarmaðurinn fór frá borði. Við eru nú á fyrsta hali og erum að reyna við blessuðu síldina.

Það voru nokkuð mikil mannaskipti í þessari inniveru og Bóndinn var einn af þeim sem mættu á svæðið. Hann er að koma frá Tenerife þar sem hann átti góðar stundir með konu sinni. Í það minnsta  brosir hann beitt sem reyndar er svo sem ekkert óvejulegt hjá Bóndanum. Merkilegur er þó munurinn á húðlit okkar, míns og Gunna. Gunni að koma úr sólinni en ég meira og minna verið inni í skrokk Guðmundar hins Góða síðustu tvo túra.

Þessar fagur rauðu húfur gera óneitanlega flotta menn flottari. Eða hvað finnst ykkur?

Þessir tveir á myndinni að neðan eru þeir Birkir og Grétar og eru hjá okkur í afleysingum. Þeir eru eyjapeyjar algjörlega inn að beini báðir tveir og hugur þeirra leitar örugglega í dalinn um helgina. En annað er líka öruggt að þeir þurfa ekki að kljást við þynnku eða móral, því nú skal bera björg í bú.

Þessir Eyjapeyjar eru vaskir og leggjast frekar á árina heldur en að sletta úr klaufunum

Haukur skellti sér heim til Akureyrar í inniverunni til að eiga góða stund í faðmi fjölskyldunnar og er mættur galvaskur aftur.

Haukur vinnslustjóri tekur þátt í trolldæminu þegar ekkert er um að vera niðri í vinnslu.

Stjáni er mikill fluguveiðimaður en hann og Róbert skelltu sér í vöðlur og vesti og reyndu fyrir sér í á, rétt við Þórshöfn (man ekki hvað hún heitir og skammast mín) og náðu þar í fimm þræl vænar bleikjur.

Það er gott að hafa Stjána bláa um borð því hann er alltaf léttur í lund, en að sama skapi er hans örugglega sárt saknað heima fyrir.

Iain var líka að koma um borð og er búinn að standa í stórræðum heima á Skotlandi. Hann var að steipa vegg í kring um lóðina sína og mokaði upp einhverjum lifandis ósköpum af jarðvegi úr lóðinni, að ég held tugum tonna. Allt með skóflu og hjólbörum.

Það hefur áður komið fram í færslum að þessir tveir eru miklir mátar og því eðlilega nokkuð auðvelt að ná þeim saman á mynd. En takið eftir þessu gríðarlega glæsilega skeggi sem Árni er farinn að skarta.,

Allt tekur enda um síðir og það á líka við um þessa færslu sem endar hér…..

Jaxlakveðja frá Guðmundi.

Sumir kunna eflaust að hugsa sem svo að það skipti ekki máli hvort síðan er uppi eður ei. Þeir blogga hvort sem er ekkert þessir anskotar.

En af okkur það að frétta að vinnslan hefur gengið vel og er útlit fyrir löndun fljótlega eftir helgi. Þá komast einhverjir í frí og aðrir koma endurnærðir úr fríi um borð eins og gengur. Framundan er Þjóðhátíð í Eyjum og eyjapeiinn Hjörleifur verður örugglega í dalnum ásamt nokkrum öðrum úr áhöfninni. Aðrir frímenn verða svo væntanlega hist og her í perlum landsins okkar á þessari mestu ferðahelgi ársins og vonandi fá allir gott veður.

Sverrir Rúnars sem er á myndinni að neðan er að fara í frí og ætlar að renna fyrir lax í Blöndu og líklega víðar. Og ef ég þekki kauða rétt þá mun hann örugglega láta einhverjar gólfkúlur finna fyrir kylfunni.

Sverrir sér um að aðeins hágæða makríll haldi áfram inn í tækjasal.

Heiddi er líka mikill golfáhugamaður og allir eru þessir golfmenn hér um borð með töluverða forgjöf sem ég ekki-golfáhugamaður kann ekki nánari skil á.

Heiddi bátsmaður hefur það hlutverk meðal annars að vera í pökkuninni á sinni vakt og er þarna að þræða nýja rúllu í aðra bindivélina.

Heimir VMK-maður stendur við eina elskuna sína og passar upp á makríllinn raðist rétt í hana.

Þetta er aðeins öðruvísi viðskiptafræði sem Kiddi er að ástunda á myndinni að neðan heldur hann stundar í HÍ á veturna, því þarna hefur hann raunveruleg verðmæti á milli handana en ekki bara tölur á blaði.

Kiddi sér til þess að verðmætin komist í frystingu.

Árni er alltaf vel til hafður en óneitanlega sérlega flottur, eins og þið sjáið, eftir að hann komst í hátískuvöruverslun Guðmundar VE.

Jæja dúllurnar mínar. Þetta verður þá ekki lengra í þetta sinn.

Heilsa af hafinu frá GUÐMUNDI hinum GÓÐA.

Sæl veri þið

Gott er að síðan okkar sé komin aftur upp á veraldarvefnum.

Af okkur er það að frétta að vinnsla og frysting gengur eins og best verður á kosið og enn er það makríllinn sem allt gengur út á. Það er þó ljóst að við verum að fara að leita meira eftir síldinni upp úr þessu.

Ákveðið var af áhöfninni að láta gera fyrir okkur boli og húfur og kom sendingin um borð í síðasta túr. Gríðarleg sala var í þessum tískufatnaði svo lág við slagsmálum, þegar menn reyndu hvað þeir gátu til að vera sem fremstir í röðinni þegar sjoppan opnaði. En allt fór þetta þó vel að lokum.

Myndasyrpan að þessu sinni er úr síðasta túr sem átti að koma í færslu þá, þegar síðan okkar datt út. Okkur og öllum aðdáendum hennar um allan heim til mikils ama.

Glæsilegir strákar í hátískufatnaði

Himmi er reyndar kominn í frí núna og hefur það örugglega gott með Svövu sinni á hjólhýsaferðalagi, í allri blíðunni sem er búin að vera undanfarið.

Og Hjölli bættist í hópinn. Af þessum mönnum, sem eru svo glæsilegir að upplagi, má sjá að lengi getur gott batnað. Bara við það að klæða sig rétt.

Haffi er líka kominn í frí og ólmast nú við að smíða bekki, koffort, súlur og annað sem til þarf í þjóðhátíðartjald handa Siggu sinni. Á milli þess sem hann skellir nokkra hringi á brautinni á mótorhjólinu sínu.

Haffi var svo flottur í tauinu á þessari vakt að það var með engu móti hægt að senda hann undir palla að þrífa.

Ég segi nú bara vá, vá, vá. GLÆSILEGIR MENN! Þó ég segi sjálfur frá.

Á myndinn að neðan eru þeir Fikki stýrimaður sem nú er kominn í frí og ætlar að gera víðreist um norðurlönd og Kiddi sem er sonur Sigga heitins Einarssonar og Guðbjargar Ísfélagsdrottningar. Kiddi kemur oft í afleysingar hér og stendur sig með príði. Alltaf með bros á vör.

Glaðbeittir náungar þeir Frikki og Kiddi og ekki skemmir fyrir þeim hversu flott þeir eru dressaðir.

Jæja, lengri verður þessi tískusýning ekki og lofa ég því að myndir í næstu færslu verða nýrri af nálinni.

Makrílkveðja frá vel dressuðum Guðmundarmönnum.

Já, þetta gerist víst á bestu bæjum að það verði hlé og biðjumst við velvirðingar á því en við höfum verið í smá vandræðum með hýsingaraðilann. Hann heimtaði pening og fékk hann en var ekki sáttur við hvernig hann fékk hann. Já, gott fólk, peningur er ekki bara peningur En nóg um það.

Við erum sem sagt búnir í túrnum sem síðasta færsla var af og komnir af stað á ný. Fórum frá Þórshöfn á föstudagsmorgun og byrjuðum á að skarka í Héraðsflóanum og í Bakkaflóa í von um að fá síld. Gekk það að hluta til eftir en þó ekki í því magni sem við þurfum og erum við nú komnir á makrílmiðin A af landinu, nánar tiltekið á Rauða torgið og erum við á fyrsta holi hérna.

Læt þetta duga í bili, verð með myndir og læti í næstu færslu sem verður vonandi ekki langt í.