Jæja, eins og fyrirsögnin segir til um, þá erum við bara alveg að verða búnir að frysta í kútinn, við eigum bara nokkra kassa eftir að setja niður og ekki laust við að landspenningurinn sé farinn að láta á sér kræla, alla vega hjá mér, enda er ég að fara í fríið. Við fengum síðast “dry” makríl í pokann en vonandi náum við að fá bara slatta af síld í næsta holi, þá verða allir sáttir:) Annars vona ég að við verðum í landi einhvern tímann á morgun, en ég hef það ekki staðfest frá Capitansky Robertsky, en það er svona mín tilfinning. Við erum að toga núna um 30 SML norðaustur af fonti þannig að stímið í land er stutt, við erum á síðasta holinu okkar þannig að hér er allt í sómanum.

Kíkjum á nokkrar myndir.

Swíng swíng and a blííííng, sagði Haukur…þessi drengur er vinnslustjóri, og er alltaf í góðu skapi, hérna er hann að raða í hausarann, að sjálfsögðu brosandi:)

Maggi Mix raðar Makríl í tæki NR-10.

Ég á ekki fleiri myndir í bili en við skulum snúa okkur að “Hinni hliðini” sá sem er fyrir svörum núna er enginn annar en aldursforsetinn, golfarinn og Bátsmaðurinn Heiddi.

Hvað heitirðu?: Heiðar Jóhannsson

Staða um borð?: Bátsmaður

Hvenær ertu fæddur?: 14. Desember 1948

Hvernig bifreið áttu?: Mercedes Benz ML-350 árg 2003

Hjúskaparstaða?: Giftur

Hver er þinn uppáhalds matur?: Allur villtur fugl

Á hvaða skipum hefurðu verið?: Sólbak,svalbak,Jóni Eiríkssyni, Jóni Kjartanssyni, Snæfellinu, Júlíusi   Geirmundssyni, Kaldbak, Þorsteini, Guðmundi.

Hvað ertu búinn að vera lengi á sjó?:Að mestu leyti síðan 1964.

Hvað gerurðu helst í fríunum?:Golf Golf og Golf, og skíði á veturna

Hvernig tónlist hlustar þú á?:Allt nema Hip-hop og Rapp

Hver eru áhugamál þín?: Golf, skotveiðar og bílar

Hvað er eftir minnilegasta atvikið á sjó?:Þegar Júpiter eyðilagði ljósalampann í þorsteini

Hvert er lífsmóttóið: Njóta lífsins og vera glaður

Með hverjum heldurðu í ensku?:Manchester united

Með hverjum heldurðu í Íslensku?:Þór Akureyri, Breiðablik Akureyri.

Ég þakka Heidda stórvini mínum fyrir að nenna að sitja undir þessum spurningum, en Himmi er að klára að elda þannig að það er best að fara að setjast á garðann.

þangað til næst, lifið heil, og við erum alveg að koma heim.

bless bless:)

Jæja þá er farið að síga á seinni hlutann hjá okkur í þessum túr og hefur þetta  gengið bara alveg glimrandi hjá okkur, við byrjuðum á að toga með Álsey, og þegar þeir félagar okkar voru búnir að fá vinnsluskammtinn sinn, þá kom Júpíter og togaði með okkur þar til að hann var búinn að fá sinn skammt, hann fór þá til eyja með afla til vinnslu þar. þá var enginn eftir til að toga með okkur og urðum við þá að bregða hlerunum undir, græja og gera svo að við gætum farið að toga okkar troll einir, og tókst það með ágætum og tókum við 1 hol eftir að júpiter  fór. var þá ákveðið að færa sig á aðrar slóðirog tókum við straujið inn á héraðsflóa og erum búnir að taka tvö hol hérna. Núna er þetta er ritað erum við að skipta yfir á partroll aftur og erum við a fara að draga með Álsey. Við erum að vonast til að geta klárað þennan túr hérna á þessum slóðum, því að héðan er örstutt inn til Þórshafnar. en ég fór á flug með myndavélina í einu tækjastoppinu og við skulum kíkja aðeins á afraksturinn.

Fannar passar upp á að ekki fari neinn fiskur skemmdur eða gallaður í frystingu, en við leggjum mikið uppúr því að framleiða hágæða vöru, sem stenst allar gæðakröfur hjá kaupanda….en glæsilegur er hann strákurinn:)

Iain raðar í hausaran, við hausum makrílinn og verður að passa upp á að hann snúi rétt í hausaranum, annars fáum við gallaðan fisk í frystingu.

Fullt tæki af eðal makríl, í einu svona tæki eru 72 blokkir, og þær eru 16 kíló stykkið af makríl, en 20 kíló ef það er síld, reikniði svo:)

Maggi með eitt stykki makríl, Maggi er að leysa af hjá okkur núna, en vanalega vinnur hann við að flytja inn og selja varahluti í Range Rover og Land Rover jeppa.

Þarna erum við félagarnir, ég og Alli að fara niður í lest.

Bátsmaðurinn Heiddi Jó, hann er enginn nýgræðingur í bransanum og er búinn að segja mér ýmislegt um það hvað sjómennskan hefur breyst mikið, hann var t.d. á síðutogara, eitthvað sem ungir menn eins og ég komum aldrei til með að reyna.

en nú ætti ég með öllu réttu að vera sofnaður, þannig að ég kveð í bili og við biðjum fyrir bestu kveðjur,

Guðmundur VE-29

Ég er ekki að vitna í fyrstu plötu sigurrósar með þessari fyrirsögn, heldur er ég að gefa til kynna stöðuna hjá okkur, sumsé, þetta fer ágætlega af stað hjá okkur. Eitthvað hefur nú veiðin verið að stríða okkur en vinnslan hefur haldist þrátt fyrir það og núna síðast hljóp aðeins á snærið hjá okkur og við fengum fínan afla. Annars eru menn bara brattir og Maggi Varahlutasali búinn að jafna sig af morgunógleðini sem hann fékk fyrstu dagana og orðinn hinn sprækasti. ég hef svosem ekkert mikið meira að segja ykkur í bili en við skulum kíkja aðeins á myndir.

Er þetta jólasveinninn myndu kannski einhverjir spyrja en nei…þetta er bara hann Hjölli.

Ég veit ekkert hvað þetta er…..

obboslega er maður mikið krútt.

jæja höfum þetta ekki lengra í bili, en við vonum að allir hafi það sem best, kærar kveðjur af hafinu,

strákarnir á Guðmundi VE

Nú sem stendur erum við staddir á Þórshöfn í löndun. búið var að landa frostinu seinni partinn og var þá fært undir grútarlöndun sem er langt komin þegar þetta er ritað. Þegar það er búið munum við sleppa og halda á síldveiðar, þá er bara vonandi að síldin gefi sig vel og við klárum þetta fljótt og örugglega. Menn gerðu sér gott í gærkvöldi og fór megnið af þeim eftirlegukindum upp á Le Ristorante Eyrin og fengu sér pizzu og með því. Í dag var svo farið í að sinna hinu ýmsa viðhaldi um borð og komu sveitungar mínir frá Eskifirði og renndu yfir trollið og kipptu í lag því sem þurfti Þar. því næst var ráðist í að splæsa upp á togvíra skipsins og leystu síðuritari og Gunni Bóndi það mál af mikilli kostgæfni, Hjölli og Alli voru okkur innan handar, og sá Konstantyn um aflraunir við splæsninguna.

Seinni partinn í dag komu svo nokkri úr fríi og tveir afleysinga menn komu til að fylla í skörð sem vantar í áhöfnina. við skulum skoða annan þeirra aðeins betur.

Hvað heitirðu?: Magnús Ólafur Björnsson

Staða um borð?: Háseti Nr.10

Hvenær ertu fæddur?: 9.febrúar 1973

Hvernig bifreið áttu?: Range Rover HSE 4,6, Toyota Avensis Terra

Hjúskaparstaða?: í Sambúð

Hver er þinn uppáhalds matur?: Það sem borið er á borð á jólum.

Á hvaða skipum hefurðu verið?: Guðmundur VE

Hvað ertu búinn að vera lengi á sjó?: 3. vikur

Hvað gerurðu helst í fríunum?: Vinna

Hvernig tónlist hlustar þú á?: Allt nema Raf techno bull

Hver eru áhugamál þín?: Íþróttir og Landrover.

Hvað er eftir minnilegasta atvikið á sjó?: Þegar ég steig frá úrtínslubandinu og kastaði upp á gólfið.

Hvert er lífsmóttóið: Betra seint en aldrei

Með hverjum heldurðu í ensku?: Liverpool FC

Með hverjum heldurðu í Íslensku?:H.K.

Ég þakka Magnúsi kærlega fyrir.

ég hef þetta ekki lengra í bili en kem með nýtt, ferskt og skemmtilegt blogg þegar allt er komið á fullt swing,

þangað til næst, Líf og Fjör

Kv Strákarnir á Guðmundi VE

Birkir og Rabbi stilltu sér upp í flott pós

Dekkliðið á bátsmannsvaktini að gera sig klára til að tengjast við Álsey.

Nú hugsa sjálfsagt margir…þvílíkt ego í einum manni að setja mynd af sjálfum sér á síðuna….en ég bara varð..

Þetta hafa nú allir séð áður, en þetta tókst flott hjá stráknum í þetta skiptið og hann var okkur til fyrirmyndar

Þetta er Haukur Vinnslustjóri….veit ekki með ykkur, en mér finnst hann alveg ljóma á þessari mynd.

Þarna er Álsey að færa sig nær okkur fyrir hífingu

Nóg um myndir í bili, ég ætla að hafa nýjan lið á síðunni sem heitir “Hin hliðin” og eftir slembiúrtaki úr þjóðskrá, varð fyrir valinu sá er kallar sig iðulega Vitleysinginn, en við skulum skoða hann aðeins nánar:

Hvað heitirðu?: Kristján Gylfason

Staða um borð?:Háseti

Hvenær ertu fæddur?:31. óktober, 1970

Hvernig bifreið áttu?:Subaru Legacy 1997

Hjúskaparstaða?: Giftur

Hver er þinn uppáhalds matur?:Færeyskur matur

Á hvaða skipum hefurðu verið?: Víði EA, Baldvin Þorsteinsson EA

Hvað ertu búinn að vera lengi á sjó?: 14 ár

Hvað gerurðu helst í fríunum?:Stunda veiði og golf,

Hvernig tónlist hlustar þú á?: óðinn Valdimarsson

Hver eru áhugamál þín?: Stangveiði, skotveiði, golf og berjatínsla

Hvað er eftir minnilegasta atvikið á sjó?:Þegar ég fór í krummafót.

Hvert er lífsmóttóið: Skil ekki þessa spurningu

Með hverjum heldurðu í ensku?:Liverpool

Með hverjum heldurðu í Íslensku?:Þór, Akureyri.

En við höfum þetta ekki lengra núna, kem með ferskt blogg flótlega aftur, þangað til njótið lífsin í botn,

Kv kórstrákarnir á Guðmundi VE

Nú erum við farnir að sjá svona nokkurn veginn fyrir endan á þessum túr, hann hefur aðeins dregist á langin sökum aflabrests um tíma, og svo var veðrið okkur ekki hliðhollt um hríð, en öll él styttir upp um síðir og eftir að síðasta færsla var skrifuð hefur staðan aðeins breyst til góðs, veðrið hefur lagast og var trollinu kastað síðustu nótt með ágætis árangri, er nú vinnslan farin að rúlla á nýjan leik og brúnin farin að lyftast á mönnum, ég tala nú ekki um þá sem eru að fara í frí, þeir brosa breytt og syngja dátt “Ég fer í fríið” sem Þorgeir Ástvaldsson gerði ódauðlegt á sínum tíma. Heyrst hefur á göngum skipsins að jafnvel eigi að færa Þórshafnarbúum hráefni til landvinnslu.

ég hef þetta ekki lengra núna en ég lofa myndum í næstu færslu sem kemur von bráðar

þangað til næst, ástarkveðjur heim

Strákarnir á Guðmundi Ve-29